(1)
قصيدة شعب
-------------
يا شعبى يا حبيبى
يا حطك فى جيبى يا ابن الحلال
يا شعبى يا شاطر يا جابر خواطر
وساكن مقابر وصابر وعال
يا واكل سمومك وبايع هدومك
وحامل همومك وشايل جبال
يا شعبى يا نايم وسارح وهايم
وفى الفقر عايم وحاله حال
احبك محشش مفرفش مطنش
ودايخ مدروخ واخر انسطال
احبك مكبر .. ممشى امورك كدا باتكال
واحب اللى ينصب واحب اللى يكدب
واحب اللى ينهب ويسرق تلال
واحب اللى شايف وعارف وخايف
وبالع لسانه وكاتم ما قال
واحب اللى قافل عيونه المغفل
واحب البهايم واحب البغال
واحب اللى راضى واحب اللى فاضى
واحب اللى عايز يربى العيال
واحب اللى يائس واحب اللى بائس
واحب اللى محبط وشايف محال
واحبك تسافر وتبعد تهاجر
وتبعت فلوسك دولار او ريال
واحبك تطبل تهلل تهبل عشان مطش كوره وفيلم ومقال
واحبك تأيد تمجد تندد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغل لى مخك وتفتح جدال
وتبدا تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللى روحك سبع رجال
ساعتها هجيبك لا يمكن هسيبك
وراح تبقى عبرة وتصبح مثال
هبهدل جنابك واذل اللى جابك واشرد عيال
وهيكون عذابك فوق الاحتمال
وامرمط سعاتك واهزأ سيادتك
واخلى كرامتك فى حالة هزال
!!!!!!!!!!!
****************************
***********************
********************
*********
***
(2)
مفيش حاجة
-------------
مش عايز خلاص حاجة
ولا محتاج انا لحاجة
ولوعايز صحيح حاجة
مخلتوش لى ولا حاجة
عموما بص فيه حاجة
هاقولها بس محتاج عقول تفهم ولو حاجة
مهيش مفهومه او حاجة
نفسرها بكام حاجة
وهى حاجة مع حاجة
هتظهر وتبان لنا حاجة
وانا ما بخفش من حاجة
مانيش مسنود ولا حاجة
بس لو هاقول حاجة هيحصل ايه ولا حاجة
هيعملوا ايه ولا حاجة
وبعد الشر لو واحد من السامعين من الضالين فهم حاجة
هيعملوا ايه ... اكيد برضه ولا حاجة
فنتوكل على الستار ونقول حاجة
فى ناس بتعيش عشان حاجة
وناس بتموت عشان حاجة
وناس بتموت على الحاجة
وناس تديلك الحاجة
وتبقى ليها محتاجة
وناس تديلك الحاجة
وتاخد قدامها ميت حاجة
وناس تكبر تكون حاجة
وناس تصغر عشان حاجة
وناس منظر ومش حاجة
وتلقى كبير حرس ونفير عليه منظر
وهو جبان وشيخ منصر
ولا يبنش عليه حاجة
كلامى ياخلق فيه حاجة
لحد دلوقتى كلام عادى وبسيط وما فيهوش ولا حاجة
ما انا مقدرش اقول حاجة
صحيح نفسى اقول حاجة
وميت حاجة لكن مش قادر اقول حاجة
لان لو هاقول حاجة
هيجى ناس بتوع حاجة
ويخدونى ورا الحاجة
وهو لو سمع حاجة
هيعملوهالى ميت حاجة
عموما لو واحد نفسه ابلغه بحاجة
يقول ومايخفش من حاجة
نعم .......بتقول ايه ......... لا لا لا
مفيش سرقه ولا تهليب ولا تهريب ولا حاجة
بتقول ايه ..... مصصمصوا ايه.... وخصخصوا ايه
دا كله كلام مفيش حاجة
قضية ايه ... حرامى ايه .... ولكح ايه
وهرب ايه.... شفافية ...... مفيش حاجة
بتقول ايه .... لا لا لا ....عيب !!!!!!!!!!!!!
لا فيه تدليس ولا ترقيص ولا تدبيس ولا حاجة
سمع هوس انا حاسس انى فيه حاجة
دقيقة سكات لاتبقى حداد
انا حاسس ان فيه حاجة
لا لا لا
انا عن نفسى بقول مفيش حاجة
ولا مضايق ولا حاجة
ساعتك برضه مش زيى مفيش حاجة
بيقول مفيش حاجة
جنابك برضه مش زيه مفيش حاجة
اهو بيضحك وبيقول مفيش حاجة
ما انا قولتلكوا من الاول مفيش حاجة
على النعمة يا اخونا مفيش حاجة
ورحمة ابويا ويا ابوك على الجابوك مفيش حاجة
وعهد الله وعهد الله وعهد الله ما خالولنا ولا حاجة
وعهد الله ما خالولنا ولا حاجة
شكر خاص لمؤلفة هذة القصيدة
الجدع فيكو يقرب من الناس دى
********************************************
هو الاخ اللى على اليمين مع مين
*********************************************
الاذاعة الاشهر والافضل على مستوى مصر والعالم العربي
اسمع راديو الام بي سي
